Bumm, Batsch unn Päng!

Na, ihr Leit, blickda noch dursch in Sachä Silveschda-Knallarei? Kaafä därfsch die Feiawärkskärwa jo nädd, dess iss faboodä. Awwa dess Abbrennä widdarum iss nädd grundsetzlisch unnasagt. Kla, odda? Unn Gemoindä känna widdarum ä Bällafaboot uff beschdimmdä Pletz ausschpräschä, wosä mähnä, dass dønn do zuviel Uffkummä wer. Wer jetz mit wass wo – hiwwä unn driwwä – schießä, rumknallä unn zindlä därff? Wissda Bscheid? Also isch ehrlisch gsachd nädd. Awwa s’issma a graad egal. Wønn’s nooch mir gäng: Isch breischds gänarell nädd – unn dess Johr zweemol nädd. Wegä Corøna, mähnt’da? Nä, iwoo, geh førd! Naja, ønnaraseits, also dess heeßd indiräkt schunn.

Bei mir iss nämlisch alle Daag Silveschda – vunn mojäns biss owänds – bloß øhnä Sekt: Bumm, Batsch, Päng – unn zwischädursch scheppads und knallts – unn Heila sinn a däzwischa! Moi Hausleit renovierä nämlisch widda mol ä Wøhnung. Do wärd dønn Butz unn Kachlä vunn de Wønd gekloppt, Schlitzä gfreest, Estrisch rausgerissä. Do kummt Schdimmung uff! Wie zum Johreswechsel! A weil aus offenä Fenschda unn Dierä vunn derä Bauschdell nädd blooß eschda Party-Troggä-Eisnewwl kwillt unn rausschtaabt, sundern a noch rumänische Dønzmusik in Abschlussballlautschdärk blost, härrlisch iss dess. Awwa s’gibt a noch Begleitmusik. Isch saach ä mol so: Dursch dess Corøna iss jo allä Daag ä ønnari KiTa zu odda ä onnaräs Schul-Kind dehääm in Karøntänä. Bei zäh Pardeiä à zwee Bøngart, alle zwischä zwee unn achdä, do hosch rundum Freed wie friah uff de Kurpalzbrigg um Middanacht – Bumm, batsch, Päng, vunn owwä, unnä, vumm Hof unn vunn de Schdrooß – do rumbelts dolby seraund kwasi. Proscht Neijohr!

A dess habt ihr nädd? Ihr misst fer Krawall bezahlä? Jesses nä! Awwa, macht eisch nix draus. Irgändänna find garøndiert ä paar aldä, droggänä Rakedä im Keller odda de Karabiner vumm Oppa mit dännä der dønn lautschdark s’neiä Johr begrieße kønn. Do binn isch ma sischa! Alla, druff unn dewedda, kummd ma gut noi, gell! Des winscht sich

Kontakt: kall@mamo.de