Habda als Problämä midd zu niedrischäm Blutdruck? Odda Kreizweh vumm vielä Rumhoggä im Birro? Odda als vielleischd a noch Kontaktschwierischkeidä? Machd eisch kä Sorgä, do hawwish än Tipp fär eisch: Fahrt mehr middäm Zug! Neilisch binn isch nooch Bärlin gfahrä. Tip-top, hawwisch moi Ruh khappt unn vor misch hiegschaaft, bissl gelesä unn nadierlisch a so ä bissl gschlofä, des muss jo im Zug als a mol soi. Die Leit um misch rumm hawwäs gänau so gemacht, do war ä herrlischi Ruh unn die Sach iss geloffä... bissä än Böschungsbrønd gemeld hawwä – der hoodd misch dønn zweeähalb Schtunn gekoscht. Kall, saagisch, dänk øn doin Blutdruck, reeg disch nädd uff, so was bassiert. Hämzus issa awwa gschdiggä: Vier Ziig sinn ausgfallä – un allä Leit sinn in ään änzischä noi: in moinä – und zwar bevor isch oigschdiggä bin. Øn moin resavierdä Platz zu kummä – do drø war nädd zu dängä. Gschdonnä bin isch unn habb schä riggäfroindlisch middä Zehä gäwippt. Lings unn räschts hosch Kerwakontakt middä Leit khappt, die Bloos hawwisch träniert, weil die Toleddä zugsperrt warä – unn abgenummä hawwisch a noch– s’ Bordbischtro war nämlisch ausvakaaft unn a zuweit fort. Ihr seht also: Zugfahre iss nädd bloß gut fä die Umwelt, sunnern a fä die Gsundheit, de Blutdrugg geht in die Heeh. Alla ihr Leit, fahrt mehr Zug, dess iss so gsund wie Schport,odda faschd hald.
Mannheimer-morgen.de/kall Kontakt: kall@mamo.de
URL dieses Artikels:
https://www.schwetzinger-zeitung.de/kultur_artikel,-kultur-fahrt-mehr-middaem-zug-_arid,1950135.html