Goldisch, unnsa Theada!

In ääm Schlaag fliegt die Dier uff, im „Fagissmoinischt“ unsara Schdommkneipp, de Wänna, unsann Wärd, fallt ball rickwärts inns Biffee beim Gläsa-Schpielä. „Heer, habbda dess schunn gsehä, dess iss allahønd!“ Rischdisch, dess kønn bloß änna soi, de Häbbädd. „S’neggschdä mol, wønn misch so vaschräggä duusch, fliegsch glei widda naus “, sagt dä Wänna, der die Uffdriddä vumm Hebbädd nädd hawwä kønn. „Awwa wønn du als Mønnema Schdeiazahla gseheä heddsch, was isch gsehä habb...“ Wassa so Uffregändäs gsehe hädd, will dodruff isch wissä. „S’Nationaltheada, wärd jo fä deia Geld umgebaut...“, „Nä, saniert, Häbädd!“, saag isch, „dess iss wass Ønnaräs!“ „Vunn mir aus, Kall, awwa in de Auguschdaølag hawwäse jetzad ä eigänäs Birro fä die Plønung vunn de Umbauarweidä!“ Wassän do drø uffregä deed, will isch wissä unn erkleeräm, dass die Leit vumm Schmucker unn vumm Theada trotz derrä Løngzeit-Großbauschdell jo a weida ihr ønnarä, normalä Aweidä machä missä unn desdewegä vielleischd hald ä paar Arweitspletz unn Räum mehr brauchä... „In de Oschtschtadt? In derrä Laag? Uff de Auguschdaønlaag? Innäm Prachtbau midd goldänä Dierä? Schduck, Intarsietreppähaus? Unn polierdä Messingschilda „NTM Generalsanierung“, du mähnsch, Kall, dess muss soi, hä?“

Isch saach: „A fä a Väddlmilliard-Bauvolumä – wønn’s løngt – brauschd schunn Leit, Häbädd, dess is jo klar! Unn der Schuppä wärd de Schtadt kehre oddam Lønd – unn do griggäse do hald fä klänes Geld uff die fünf Joh ä Birro zur Verfigung gschdellt, so wärd’s soi.“ Fallt ma de Wänna ins Wort: „Moment ä mol: Isch känn des Haus, mit so Dierä hammä nämlisch bloß äns: Do Känn isch misch aus, dess kehrt nädd de Schtadt. Äm Lønd hodds ä mol ä Zeit long kehrt, Schulømt unns so sach wa do glaawisch drin, awwa dess iss schun løng øn änn Frønkforda Immobilliä-Inveschdor vakaaft worrä. Privada geht’s ga nädd“ De Häbädd glei: „Siggschdess Kall, nix billisch iwwa die Schtadt, beschdä Lagä, Hochglønz fä deia Geld!“ Isch gebb uff: „Alla, wass wollda dønn, Kuldur bringt jo a Glønz nooch Mønnem, odda nädd?“ De Häbbädd lossdsisch nädd: „Sei ma nädd bees: Uff de Vogelschdøng regänds in die Schul noi, uffm KFG warä die Kinna johrgongsweis biss zum Abidua in Cøndäna khoggt ...“ – „Im Lessinggymnasium hoggäsä heid noch drin!“, kreischt dä Wänna hinna de Thek zwischänoi –„...unn die Härrschafda vunn de Generalsønierung räsidierä hinna goldäne Dierä?“ – „Ja, sag isch, mønschmol sinnse schunn goldisch øn unnsam Theada...“

Kontakt: kall@mamo.de