Isch krigg Platzøngschd!

Ma mähnt jo imma, ma wissd Bscheid, gell? Awwa mønschmol hawwä a vamointlisch klarä Begriffä ønnarä Bedeidungä als wie ma mähnä duud. Nämmä ma mol dess Wørt „Platzøngschd“. Die Meischdä vaschdehä dodrunna die Øngschd vor engä Fahrschtuhlkabinä, klänä odda iwwafilldä Roim. Dess iss awwa vakehrt, dess schweißtreiwändä Gfihl heeßd rischdisch nämlisch „Klaustrophobie“, also kwasi Oischlussøngschd. Eschdi Platzøngschd, also Moräs vor großä leerä Pletz heeßt nämlich „Agoraphobie“, Sachä gibt’s, gell, dess klaabt ma ga nädd. Kaum mähnt ma awwa, ma wissd jetz bscheid, kummts widda ønnarschda: Kummt nämlisch änna aus Mønnem, iss Platzøngschd widda wass gønz wass ønaräs: Nämlisch die Øngschd des Mønnemas vor de Gschdaldung effendlischa Pletz dursch soi Schtadtvawaldung. Do mähnsch – mähn du narrä – du heddsch de Umbau vumm Herschelplatz hinna de U-Schul ästhedisch iwwawunnä, do schtolwersch a schunn iwwa de unneedischä Kurpalzkreisel volla ins Leere fihrenda Wegä, um dønn dief schockiert iwwa de Brick in die schwatze Drägg-Pfitzä vumm Aldä Messplatz zu schdehä, wo uff pizzagroßä Vakehrsinslä doi Lewä in Gfahr bringsch. Wonndä mähnsch sie heddä da de Schillerplatz, s’Neggador, de Pløngäkopp unn de Neimarkt vahundst – donn fahrsch grad ä mol niwwa... Kweelsch disch dursch die schunn imma viel zu äng Bøhofsunnafihrung – immahin dä letzdscddä Kanal, s’letzschdä Mausäloch, dessä uns gelosst hawwä – niwwa uff de Lindähofplatz, pardong, „Hauptbahnhof Süd“. Schlimma geht imma – aldi Mønnema Bauømtsregel! Zwee Fußballfelda schwarza Bedongpladdä waddä do uff disch. Fär wass ? Fär wänn? Fär nix. Zum Flanierä unnd Vaweilä? Wer sollän do hoggä wollä, hä? Känn Bøøm känn Schtrauch, bloss Hitz uff vasiegeldä Fleschä. Awwa, glaabdma, isch fihrsä allä niwwa, die Buga-Bsucher aller Herrä Lända – unn zeigänä, warum in Mønnem Platzøngschd die øm meischdä vabreidäd Volkskrønkheit iss!

Kontakt: kall@mamo.de