Kennä mir uns?

Dess muss sellämools ähn gønz dollä Owänd gewesä soi, midd gudä Gschbreeschä, unn subba Schdimmung. Unn Alkohol, glaab isch, muss do jo schoint’s a im Schpiel gewesä soi. Isch konn misch hald blooß nimmä entsinnä... Isch muss gschdehä: Isch weeß nix mehr vunn dämm Gønzä...

Wønn isch awwa uffs Babier vor mir, also dess Schreiwä vorma uffm Kischedisch gugg, gibt’s kä Zweifl: Isch muss derä Fraa Vodafone dess vadraulischä „DU“ øgebodä hawwä. Irgändwønn, offesischdlisch. Im Schooseegrawä odda beim Schwoinähiedä, kä Øhnung. Debei basst dess so gaa nädd zu mir. Isch habbs eigändlisch nädd so midd Telleføn-Øbieda unn Kaawäll-Färnseh-Bädreiwa. Kømisch. Isch weeß näddämol so genau, ob die Vodafone ä Fraa odd än Mønn iss, so vanewwlt muss isch gewesä soi!

Däbei sinn dess doch ga kä Schwedä, odda? Vunn de IKEA odda vumm H&M iss ma die vadraulisch Øschmusarei jo midddlaweil gewähnt, awwa vunn so Funk-, Kawwel- unn Seelä-Vakeifa jo eigändlisch nädd, weil di jo uff serriääs machä, die Brida, die windischä. Moi Großmudda, dess iss sischa, hedd do bei dännä (schnella wie Glasfaasa) øgerufä unn sowas ähnlisches gsacht wie „Wie kummän SIE ma vor?“, „Kennä mir uns?“ odda „Dass mir zwee per Du sinn – dess wissd’isch!“ Awwa die Oma, so isses leida, kønn ma heid a nimmi helfä, unn so muss isch misch ugfrøgt vunn so uvafroränä Hutsimpl duzä losse. Isch määßd misch mol erkundischä, ob ma dennä wegä Fräschheit wass vunn de Räschnung abziehä kønn... Isch bleib drøø!

mannheimer-morgen.de/kall Kontakt: kall@mamo.de