N’Morgään, heeßd dess!

Monnem. Ihr Leit, isch will jo do nädd pärsänlisch wärrä, awwa isch saag Eisch jetz äfach ä mol, a wønns Eisch nix øgeht, dassisch zur Zeit øn de Nordsee hogg, wo isch „in Kur“, also heidzudaag Reha bin. S’issma wänischa ä Øligä, Eisch moi Krønkheidä zu fagliggarä, als vunn dännä schproochlischä Erlebnissä zu berischdä, die isch dodrowwä allädaag hab. Die Leit, die bei uns jo ä bissl uuscharmønd Fischkepp heeßä, sinn in Wirklichkeit furschba klohr, awwa hald a gønz, gønz furschba arm! Roä Fisch unn biddaräs Bier - unn färdisch, so groß iss dohowwä die Armut! So arm sinn die, dassä näddä mol än rischdischä Dialekt hawwä. Leida hodd sisch dännä ihr „Platt“ noch wänischa kaldä, wie Kurpelzisch bei uns. Trotzdäm gibt’s imma noch ä paar gønz kømischä Sachä, die ähm do uffallä. Weil die so arm sinn, hawwä die zur Begrießung a bloß ä änzisches Wort: „Moin!“ - a nochmiddags um vierä odda øbends um achdä: „Moin!“ Wännisch Auswahl iss hier a boim Føngo. Dess legt da entwedda ä Fraa Petersen, Carstensen, Jansen odda wahlweis Jensen uff. Schmidts, Müllers unn Meiers hawwäs bei de Völkawønderung do nuff schoint’s nädd gschaffd.

Wønn iwwas Wedda jäämersch, kriggsch gsacht, dess wer känn Regä, sunnern bloß „feuchte Luft“. Nudlä kummä maximal alle färzäh Daag - unn dønn als „Teigwaren“ - uff de Disch, wo die Salzkadoffl de Schpeisepløn feschd im Griff hodd. Die geize mit Nuddlä unn midd Wordä, die Friesä!

Fä dä „Hinnerk“, moin gehbehinnerdä Dischnochber im Schpeisesaal, iss jedi Form vunn Noochdisch „Pudding“. Joghurt, Milschreis, Obschdsalat - alles äns! „Hoiner, dess iss känn Budding, dess iss Fruchtquark, weißa Kees mit Obschd!“, saag isch. Awwa der Hinnerk kummt aus Flensburg unn mähnt uff moin diffarenzierte Kurpelza Kulinarik-Vortrag alle Daag bloß: „Joou, macht nix, bringst mir noch so’ne Pudding miiit?“ Kømisch iss dess alles! Isch rädd ä halb Schtund - unn die Øntword laut imma wie? „Joou!“ Die beschdehä druff, dass dess än vollschtändischä Hauptsatz unn die bassend Øntword uff alles wer. Awwa isch loss misch nädd fabiegä! Uff jedes „Moin!“ dunnert’s vunn mir zurigg „n’Morgäähn, heeß dess!“ Dess mähnt eiern Kurpelza Bootschaffda øn de „Waterkant“.

Ihne Ihrn Kall

Kontakt: kall@mamo.de