A bin isch dønn bleed?

Neilisch, ihr wärd’s kaum glaawä, warisch im Kino – und dess nädd allää. De Hoina unn de Wänna warä a däbei, de Häbbäd nädd, der wa krønk. Mir hawwäs uff de letschdä Drigga grad noch gschafft, unns dänn neiä James Bønd øzuguggä, der iss jo jetz a schunn ä paar Daag draußä, gell. Wie dess hald so iss, friah, wønn än neiä 007 rauskummä iss, warä ma øm ärschdä Daag drinn, schpeda in de ärschd Woch, heid simma froh, wønn ma dän Schdreifä iwwahaupt noch im Kino zu sehä kriggä. Gfallä duud uns dess jo nimmi so gut wie friah, wegä dämm iwwadriwwänä Bumm-batsch-päng innarä Affälautschdärk. Awwa egal, s’iss hald Traditiøn, wass wilsch machä, geh ma hald noi, gell.

Wie ma im Kino alles vorgäzeigt khappt hawwa, Impfnoochweisä unn so weida, unn midd de Maskä im äntschpreschända Saal hockä, heer ma am Oigøng änna rummeggärn. Dass dess so nädd gehä deed, unn er deed sisch vahonnäbibbelt vorkummä, unn nädd mit ihm, unn soweida, hamma dänn Mønn vunn Weidäm dischpedierä heerä. „Kännsch grad mähnä, dess wer unsan Häbädd“, sacht de Wänna unn de Hoina lacht: „Hajoo, der wees a imma wass!“

Die Wärwung føngt ø, do mähnt dä Hoina: „Heer, falld eisch uff, dass mir drei Dabbischä die änzischä sinn, die ä Mask uffhawwä?“ Do dreht sich vor uns ääni um. „Die Leit, die wass fazehrä, därfä die Mask absetzä.“ Do froogisch misch: Wer mach dønn so Gsetzä? Machä ma dänn Zierguss wegä de Sischaheit odda wegäm gastronomischä Umsatz? Do kønnsch awwa middäm Wänna nädd so gut schtreidä, weil der jo Wärd iss unn zu der Sach ä gønz ønnari Moinung hodd. „Unn jetz?“, frogd de Hoina? Mir hawwä nämlisch ä Probläm: Ma megä wedda Popcorn noch Flaschäbier, noch Cola, Natschos odda Eiskonfekt. „Unn jetz?“, frogd de Hoina nochämol. „A isch binn doch nädd bleed! Hogg misch do allää mit Mask unna die kauändä Krimmlmonschda!“ Dä Wänna iss dønn uffgschdonnä, hodd drei Wassa kholt. Dess war dess ärschdä mol, dass uns unsan Wärd ä Wassa ausgewwä hodd. Nää, dess Corøna iss wirklisch schlimm!

Kontakt: kall@mamo.de