Dess iss doch abgschprochä!

Mannheim. Ihr känntma sagä, wassda wollt, awwa isch bin ma sischa, dass die Brida allä unna äna Deck schdeggä! Awwa imma de Reih nooch. Øm Freidaag hawwisch uff ä Päckschä gewartt. Da isch die gønz Woch im Birro war unn øwänds noch än Tärmin khappd habb, hawwisch ma gedängt: „Alla, machsch am Freidaag graad ,Homeoffice’, krigsch doi Peggl unn in Ruh doi Arweit gschafft...“ In derrä Sekund, wo isch dess bschlossä habb, do deed isch druff weddä, iss schoint’s ä – vielleischd ausgeleest vunn irgändwelschä neurologischä Vorgäng in moina Härnn-Cloud – ä E-Mail øn allä meeglischä Kaschper rausgøngä: „Owacht, de Kall macht Homeoffice, biddä allä zwischä neunä unn fünfä gschlossä øn de bekønndä Adräss øtredä. Ma schießä aus allä Rohrä!“ Die Mail iss dønn øn allä gøngä, die Krach unn Uumuus machä. Punkt siwwännä hodd de Schlagbohrer im Erdgschoss losgälegt. Sønierung, hajoo. Kaum hawwä die Høndwärga Paus gemacht, iss die Millabfuhr øgerummbld kummä. Gegäiwwa iss zeitgleisch än Außäkompressor uffgebaut worrä, weil se die Fassaad abschtrahlä, wehränd die Gärischtbaua middäm Mørdskrach ihr Sach abgebaut unn iwwa fünf Schtock gekrischä unn gekleppert hawwä. Unna dänn Sound hawwäsä sisch hinnänaus weidarä Foldainschdrumendä gemischt: die Hausmeeschda-Firma middm Laubbläsa, die Gaddäfirma midd Kettäseeg unn Heggäscheer. Wie dønn ääns weida de Dieslrasämäha øgføngä hodd – unn schreeg driwwä de Lieffawagä midd ännarä neiä Oibaukisch fä de zweddä Schtock vorgfahrä iss, hawwischs kabbierd: Dess iss känn Zufall – do schteckt än Pløn dähinna! Die Koppheera unn Ohrschdeppls habbisch ausgezogä, wie die Schaffa allmehlisch unna Absingä des bekønndä Lieds „Hoch die Händ – s’iss Wochäend!“ abgezogä sinn. „Ärschdämol durschschnaufä, härrlisch, die Ruh!“ Awwa Momändämol, wass issn dess? Seh unn heer isch rischdisch? Driwwä bauä’se die Bierbänk färs Hof-Feschd uff... unn vunn owwä... Nää, biddä nädd! Isch sach bloß ä Word: KINNAGEBØRDSDAAG! Alla, dønn, schänäs Wochäend...