Schwetzinger Zeitung Plus-Artikel Mundartglosse Die Leit unn die Plønung

So änn Bleedsinn awwa aa!“ Ihr kännt‘s eisch vorschdellä, de Häbbädd issäs, der widdamol lautschtark mauländ beim Wänna in die Beitz noikummt. „Tach! heeßd dess“, ruft unsärn Wärdd schlecht gelaunt iwwa de Tresä , weila hald imma noch mähnt, er käängt de Häbbädd zu äm kuldivierdä Mensch machä. Mir ønnarä, also de Ginda, de Pelza unn isch, mir sagä nix. Mir hawwä uffgewwä.

„Wass knoddersch‘dønn widda?“, mähn isch, unn de Häbbädd, ihr kännd’n, legt nadierlisch glei los: „Habbda eisch mol dänn färdischä Umbau vunn de LaRö øgeguggt, hä? Dess issdoch s‘Letzschdä!“ Do muss ma nadierlisch ärschdämol akleerä, dass „LaRö“ in de Mønnema Neggaschtadt die Abkkärzung fä „Lange Rötterstraße“ iss, kwasi die Hauptax, Øikaafsschdrooß unn s‘sozialä Zäntrum vumm östlischä Stadtdeil. Unn ewä die iss uff Øregung änzelna Øwøna umgebaut worrä unn uulängschd färdisch worrä.

„Wass bassdann do nädd øn derä Vakehrberuhischung?“ froogt de Pelza vunn hinnä. „Ä gønzi Mäng nädd! ,vakehrberuhischda Gschefftsbereisch‘ dess iss doch än Widdaschpruch in sisch! Wønn isch dess schunn heer, krigg‘isch Blutdruck!“ Dä Ginda, de Witzbold kontert: „Häbbädd, dess kummt vunn derä ,Durschflussvaängung‘!“ Ma lachä allä, außam Häbbädd: „Gibbts jetz än durchgehändä Radweg, hä? - Nää, imma noch nädd. 20 km/h? Schnella hosch sowieso nie fahrä kännä, weil de gønzä Daag minneschdänns vier Simbl midd laafeändäm Modor in de zweede Reih vorm Begga odda de Bønk schdehä! Entsiegelt hawwäsä høndduchgroßä Hundäkackschdreifä. Däfir hawwäsä øn de unneedischsdä Eggä Trottwa so breet wie ä Audobøhn hiegekachelt, um noch mehr Schrottablagäpletz, also Fahrradbiggl, uffzuschdellä. Heeari Uffenthaltskwalideed, dass isch nädd lach!“ Ma missäm ins Wort fallä, derart kumm‘da ins Schännä: „Häbbädd, reeg disch nädd uff. Gut gemähnt waars jo, awwa leida hodd’ma hald widdamol bei de Plønung s‘wischdischsdä nädd mitoikalkuliert: die Bleedheit vunn de Leit ...“

Ihne Ihrn Kall

Schreiben Sie mir: kall@mannheimer-morgen.deAlle Artikel vom Kall: mannheimer-morgen.de/kall

Mundartglosse alle Kolumnen von De Kall