Kännda eisch noch øn dänn Slogän vunn de Bollizei ainnern: „Dein Freund und Helfer“? Wahrschoinlisch nädd, weil dess wirklisch arg løng heer iss. Oigedänk iss äm der Schpruch bloß, weil die Kurpelza dänn Satz nadierlisch glei vauuzt hawwä. „Moin Froind, isch helfda!“ hodd sisch bei mønschä biss heit als Ersatzwørd fä Bollizei khaldä. Außarä posidivä Setzung, also äm Frøind, der helfä duud, iss ä Drohung worrä. Also eha in die Rischdung: Kumm heer, isch gebb da glei! Dess soll gschpessisch soi. Awwa, hald eisch feschd, tatseschlisch kummä ma der Sach so räschd noh.
Der Schpruch schtømmt nämlisch aus de Weimara Rebbublik unn sollt søina Zeit ä bessaräs Bild vunn de ∅rdnungsmacht zeischnä, alssä zu Kaisas Zeidä wa, nämlisch preißisch-schträng. Ma solld kä ∅ngschd mehr hawwä vor de Bollizei, sunnern Vadrauä.
Wass dønn die Nazis drauß gämacht hawwä, iss bekønnt. Deshalb iss der Schpruch kwasi vorbelaschd - unn wärd nadierlisch heidzudaag vunn offiziella Seid bei de Bollizei nimmi vawendt.
Do drø sieht ma awwa mol widda, wie løng sisch so Schprisch im Volksmund haldä. Wønn moi Mudda mied wa, hoddse beispielweis gsacht: „Kinners, isch bin erschossä wie‘s Robertsche Blum!“ Isch mähn... Dess war 1848 im Vormärz, dass der frihä Demokrat erschossä worrä iss. 150 Johr schpeeda gibt‘s die Redäwändung awwa noch. Awwa zurigg zu de Bollizei. Wønn die uøgenähmä Folgä vunnarä Sach allgemøin bekønnt sinn, sacht moin Kollesch gärn: „Frogsch grad än Schutzmønn!“ Die gibt‘s nadierlich a längschd nimmi ...
Ihne Ihrn Kall
Schreiben Sie mir: 
URL dieses Artikels:
https://www.schwetzinger-zeitung.de/leben_artikel,-ansichtssache-moin-fr%C3%B8ind-isch-helfda-_arid,2320087.html
Schwetzinger Zeitung Plus-Artikel Mundartglosse Moin Frøind, isch helfda
Heute wird‘s historisch: Unser Dialekt-Kolumnist Kall geht einem alten Spruch auf die Spur.