Løngsøm wera gfahrä, sagda, de Häbädd. Ma hoggä in de Beiz beim Wänna unn dischpedierä iwwa än Boinnah-Ufall. Ihm weer faschd äni, also ä Fußgängern, ins Audo gerännt. Ma sinn nadierlisch entsetzt - unn vor alläm froh, dass nix bassiert iss. Fer die Fraa, awwa nadierlisch aa fä de Häbädd, weila jo sunschd soinäs Lewäns nimmi froh worrä wer. „Die hodd sisch die Vorfahrt erzwungä!“, mähnt de Häbbääd.
„Vortritt heeßd dess“, saag isch, „die iss jo nädd gfahrä, sondärn geloffä, odda?“ Dess hodda oigsehä, de Häbbäd, war sunscht aawa im Räschd unn somit in soim Element. Er wer jo schließlisch känn Abbiega gewesä. Do hett „die bleed Ømsl“, wiea so saagt, de Häbädd, jo nooch Paragraf 9, Absatz 3 Vorfahrt, also äh, -Tritt khappt, „awwa doch nädd øn de gladdä Schtrooß!“ De Wänna, de Ginda unn isch wissä, wassa mähnt, lossä uns awwa genisslisch erkleerä, wass des soi soll. Im Prinzipp hawwä’mamm jo Räschd gewwä, weil uns a schunn uffgfallä iss, wie selbschtvaschtändlisch die Leit inn Wohngebiedä odda Dreißischa-Zøhnä grad so vorda queer iwwa die Schtrooß laafä.
„Die mähnä, die hawwä die oigebaut Vorfahrt!“, regt sich de Häbbädd uff. „Die wa friah beim Benz seriämeeßisch!“, feixt de Wänna. „Dess Problääm“, mähnt de Ginda, „iss, dassäs die Leit schoints wirklisch nimmi wissä. Die mähnä, ma kängd grad wo-iwwa-all so iwwa die Schtrooß laafä unn die Autos määßdä dønn øhaldä.“ Isch wärf oi, dassäs aa Sottänä gibt, die sisch nädd gønz sischa sinn, unn dønn so bleed schreeg iwwa die Fahrbøhn laafä. „Gänau!“ De Häbbädd iss heit gønz im Gligg unn im Räschd: „Dess sinn die Schlimmschdä!“
Ihne Ihrn Kall
Schreiben Sie mir: 
URL dieses Artikels:
https://www.schwetzinger-zeitung.de/leben_artikel,-ansichtssache-schreeg-iss-naedd-bessa-_arid,2323870.html
Schwetzinger Zeitung Plus-Artikel Mundartglosse Schreeg iss nädd bessa
Herbert ist im Recht und somit im Glück. Unser Kall „dischpediert“ heute mit seinen Kumpels über kurioses Verhalten im Straßenverkehr.