De Kall mähnt: Middäm Schlauch?

Dess war ä Sach die unn die letzsch Woch, middäm Contäna im Mønnema Høndelshafä, hä? Moin liwa Mønn, iss do rund gøngä. Kreisrund im Kwadrad, sozusagä, weil nädd blooß im Hafä, sunnern øføngs a uffm Ring Zierguss wa, midd Siränä unn allem. Isch habb die Fänschda zu khappt. Än Inschpektionstärmin in de Wärkschtatt iss ma wegä fakdischa Vollschperrung a geplatzt, awwa sei’s drum, Sischaheit geht nadierlisch vor.

Nooch drei Daag hawisch morgäns dønn immahie alsmo kørz schdooßlifdä därfä, dongschää a, bei därrä Hitz, die’s die letzsch Woch noch khappt hodd. Iwwa zäh Daag geht dess jetz. Isch lees jo alles zu dämm Thäma, wass ma in die Finga kummt – unn a uff Foddos vumm Gschehä bin isch bsunners schaaf. Dodebei machschda hald a so doi Gedøngä. Middm Schlauch hawwäsä druff kaldä, dagäløng, um die Sach midd Flusswassa runnazukihlä, wännischäns midd Feiawehrschleisch unn nädd middäm Gaddäschlauch. Also nämmdmas nädd iwwl, awwa so hedd dess unsaäns a gemacht, wønn äm so än Fall dehääm odda im Gaddä unnakummä deed. Wass isch dodemit sagä will: Gewunnert hawwisch misch, dass die Sach so ødømlisch geleest worrä iss. Bei so äm Weltunnanähme wie de BASF, midd Steam-Kräcker unn alles, hedd isch mir mehr erwatt. Mindeschdäns ä schpezielles Troggä-Eis-Granulat heddäse doch regnä lossä kennä oder reaktiønsbrämsende Foliäzeldä driwwaschdilwä kennä, oddä nädd? Irgändsowas Abgfahrenes hald, wass dess Vatdrauä in Chemie, de Hafä, die Feiawehr im Allgemøinä – unn in die Ønilin im Besonderä gschdärkt hedd. Schtattdessä: Schlauch druff haldä unn Fänschda zu. Allä sinn se jetz glicklisch, dasses gut ausgøngä iss, unn lowä sisch im Kreis. Es wärd kä drei Daag mehr brauchä, dønn wärd der schäne Satz zu lesä soi, dass „zu keinem Zeitpunkt Gefahr für die Bevölkerung“ bäschdonnä heed. Wie imma hald...

Kontakt: kall@mamo.de