Nix mit Tøngo nooch Føngo!

Wie isch eisch letzsch Woch fazehlt habb, hogg isch jo derzeit øn de Nørdsee zur Reha. Nä, dess heeßd nädd Kur, allenfalls Roßkur. Dess iss ä ärnschdi Øgälegännheit, dess kønn isch eisch sagä! Um vornäweg also glei die neggschdä Frogä zu beøntwordä, die ma am meischdä vunn dehäm gschdellt wärä: Nä, s’gibt kän Tøngo noochäm Føngo, unn nää, isch hab kään „Kurschaddä“. Unn iwwarischäns heeßd dess längschd „RÜP“, also „Rehaüberbrückungspartner“, bloß zu eirer Informatiøn unn dassda wass däzulernt.

Wass isch in Frieslønd däzulern, iss, dass es schoinz regional typische Faletzungä gibt, wegä dännä die Leit dønn inn Krøngäheisa unn Rehaklinigä kummä. Freilisch geht’s øm End umm kabbudänä Knochä - awwa der Weg dohie, schoint ma doch - mit Falaub - sehr nordisch.

Bei uns am Disch im Schpeisesaal, bin isch dä änzisch mitttem „normalä“ Ufall, wie isch sagä deet. Vumm Fahrrad sellemols uff die Gosch gfallä, färdisch. Die ønarrä Dischgenossä hawä Sachä, do wischd ga nädd, wiedä dess bei uns dehääm hiegriggä solscht!

Dess Fralä newä mir iss middäm „lütten Treggär“, also klänä Bulldogg, uff ihrm Grundtstick in de Grawä gfahrä unn hødd jetz än komplizierdä Schuldabruch, die arm Fraa. Wass die midd 86 noch uffm „Treggär“ macht, wollt ich wissä? „Joou, ich kenn dat ja nich anders, in Dithmarschen wirst aufm Treggär geborn, ne?“ De Ønna gegäiwwa hodd die Fieß „beim Torfstechen eben“ unna die Schipp vunn soim Newämønn gebrocht. De Neggschdä hodd de Haxä „beim Einbringen“ zwischä zwee Fischkutter khappt. Än onnarä Høndwerga iss vumm Reetdach gerutscht... Isch mähn: Mol ehrlich, dess iss doch nädd normal? Awwa Kinschtla sinns trotzdäm! Irgendwo „runna“ zu fallä, dess musch in so äm flache Løndschtrisch ärschdemol hiebringä! Uff jeden „Fall“ awwa: Dess Lewä iss schoint’s gfehrlisch in Norddeitschlønd. Alle Daag ward isch druff, dass isch ähna treff, der ma fazhelt, dassa sisch beim „Krabbenpulen“ die Händ gebrochä hodd. Wunnarä deeds misch nädd!

Ihne Ihrn Kall

Kontakt: kall@mamo.de