Wo viel Lischd iss …

Habbda schunn kehrt, Männa“, sagt de Wänna, unsern Wärd vumm „Vagissmoinischd“, „die ,Winterlichter’ im Park falle aus“. De Schorsch unnsan neiä Pelza hinnä in de Eck wees garnädd wovunn die Rädd iss. Alla ärkler isch’säm: „Dess iss so ä Lischdafeschd odda ’Open-Air-Iwänd’, wie ma heid sagt, wo alles bunt øgschdrahlt wärd im Luisäpark.“ Do kummd dä Häbädd, unnsann Bessawissa, schunn däzwischä: „Nä, Kall, dess hedd dess Johr im Herzogäriedpark soi sollä, weil se vor lauda Umbau die Leid nimmä in de Park noibringä.“ Isch saag: „A wass? Iss jo awwa jetz a egal, s’find jo eh nädd schtadd wegä Corøna, ä wegä Schdrøømschbarä, mähn isch nadierlisch.“ „Gänau!“, sagt de Wänna, dess falld gänauso aus wies ,Zooleuchten’ driwwä in Heidelbärg.“ De Wänna dodruff gønz gedetscht: „Mir iss dess jo nädd so wischdisch, awwa moi Møni wer hald so gern hie, die liebt dess.“ Isch saag zum Troschd: „Ha ja, ma missä hald in dennä hardä Zeida allä Schtrøøm schparä, hodd de Herr Milla vunn de Bundesnetzagentur in Berlin gsacht, dø kännä mir in Kurpalz kä Ausnøhm machä, gell.“

Middä in die triebsinnisch Schdimmung, schallt’s laut aus de Eck hinnä vumm Pelza, der – um uns zu ärgern – als soi rhoiseidävakehrdi Pelza Zeidung debei hodd unn laud nauslacht: „Berlin? Unn schparä? Do gugg, wass in de Zeidung schdeht: ,Berlin lädt zehn Tage zum ,Festival of Lights’, iss dess nädd zum Lachä?“

„Nä“, sagt de Wänna, „isch kännd do eha heilä. Dess iss nämlisch dess, wo isch die gladdä Wänd nuff kännd, wønnse Wassa prädischä – unn Woi saufä!“ „Ha dess hodd jo jetzt middä Rägierung wännischa zu duä“, mähn isch.

„Vielleischd kännä ma uns do druff oinischä, dass, wo viel Lischd iss, ihr wisst, a viel Schaddä iss“, vamittelt de Wänna. „Dess sowieso“, mähnt de Häbädd, „Isch mach’s heid wie in Berlin!“ Ma guggän all. „Isch blooß eisch heids Lischd aus – mach’ uns mol vier Schollä – ohnä Wassa!“

mannheimer-morgen.de/kall Kontakt: kall@mamo.de