Isch bin än Liggäbiesa!

Neilisch war isch widda mol sømsdaags in de Schtadt. Isch wolldämol ä Exämbl schtaduierä. Weil isch alleweil, wo isch hie unn naus kumm, zu heerä krigg: „Mir gehä nimmi in die Schtadt noi.“ Die Lumbehäfa unn onnarä Pelza fahrä liewa nooch Schpeyer odda Neischstadt zum Bummlä unn Oikaafä, ønnarä nooch Heidlberg odda ins Rhoi-Negga-Zäntrum nooch Värnnä. Mir Mønnema werä selwa schuld: vunn drei Seidä midd Bauschdellä abgeriggld unn donn noch än Fakerhrsversuch middänoi – dongschää. Mir, ihr liewä Leit, dess will isch eisch mol sagä, duut dess weh, isch binn jo hald än Mønnema Bu unn muss de Wassaturm sehä unn alsmol die Pløngä hoch- unn nunnascheeßä, sunsch gäng isch wie ä Priml oi. Was soll isch dønn uffm Lønd? Isch setz ä Zeischä fä de Mønnema Høndl. Allaa, haww isch gsacht, ziehsch disch ø unn fahrsch noi. Middäm Rad nadierlisch, die Kurplazbrigg iss jo fä die Schdrooßäbøhn gschperrt. Isch mach jo kä Haafärundfahrt middä Elekdrisch iwwa die Schafweid unn die Ewwertbrigg unn de gønzä Ring, isch bin jo nädd middäm Klømmaräsack gepudert.

Habb nadierlisch glei äni gedroffä vumm Gsøngvaroi, also vielmehr die Fraa vunnemä Søngesbruda. Mir hawwä unns løng nimmi gschbrochä, unn weil ihrn Mønn a glei kummä deed unn weils Middagszeit war unn de Mänsch wass essä muss, hamma uns, gønz wie die Birgameeschda dess wollä, vakehrsberuhischd in so ä „Parklet“-Bucht uff de Fressgass gsetzt unn wass bschdelld. Isch kønn eisch sagä: Fehla! Die porzionsweis uff Umleidung zum Ring wardändä Autofahra kenna da nädd blooß uff de Della glotzä, nä, sie bloosäda a nädd blooß ihr Abgasä, sønnern aus offenä Fenschda a Zigaräddäraach unn Musik in ännarä Lautschdärke entgegä, dass de taub wärsch. Dønn zwee türkischä Hochzeidä, die trotz Stau hubä, dønn noch ä Querdänga-Demo midd Paukä unn Trompedä... Døngschää a, mir hawwä unsa eigänäs Wort nädd vaschdonnä unn de Abbedidd war uns a vagøngä. Wer will dønn do sitze? Wer in Parkliggä midd Betøng, Gschdøng unn Lärm ømtsdeitschi „Aufenthaltsqualität“ zu finnä mähnt, duut ma leed, der iss øm Änd blooß än schtedtischä Liggäbiesa.

Kontakt: kall@mamo.de