Dess iss doch känn Beruf!

Neilisch, vielleischd entsinnä se sisch – unn ihr eisch – war mol die Rädd dävuu, dass de Begga Kapp in Edingä zugemacht hodd, weila, wie ma bei uns sagt, kä Leit khappt hodd, de Kapp. Des heeßd also, øn Kundschafft hoddsäm nädd gemønglt, awwa øn Fachpärsonal. Do issa jo bekønndlisch nädd allää, de Begga Kapp, do kännä Fliesäleega, Mola unn Dabbezierer, Schpängla, Inschdaladeerä unnsoweida genau dess gleische Liedschä singä.

Isch mähn, s’iss jo intressønd, wie sisch Berufswinsch odda ewä a sogenønndä Traumberufä vaännern duä. Also, vunn Lebewese, die elda als fünf Johr sinn, hab isch schunn seit Johrä nix mehr kehrt vunn „Loggomodivfihra“ , „Aschtronaudin“, „Krønfihra“, „Tierärzdin“ odda „Baggafahra“. Redsch heid als mol so middä jungä Leid, wassä schpeeda mol wärra wollä, ob se ä Ausbildung machä, schtudierä odda liewa ä Hondwerk lännä wollä, do kummä die Berufä nädd vor.

S’gibt jo heid a gønz onnarä Meglischkeidä fä die Jugänd. Noch vor zäh Johr wolldäse „irgendwass mit Mediä odda Compjuda“ machä. Heit heeße die Traumberufe: Popschtar, Youtuber, Moddl, Influenza, Brainschtormer ... Isch mähn, dess sinn doch kä Berufe odda? S’Neischdä, so hawwisch kehrt, iss schoint’s „Partycrasher“. Also so ä Art Uffmischa iss dess. Leit, die schleschdi Schdimung uff Partys vabreidä un Ärga suchä. Unn dodefir sørgä, dass dess Feschtl nix wärd. Isch hab ganädd gewisst, dass dess än Beruf iss! Die kømma offensischtlich middlaweil schtundeweis buchä.

Mol ehrlisch: Mir hedd dess jo mol änna sagä kennä, dass ma doodemit heitzudaag sei Geld vadienä kønn. Dess wer mir a liewa gewesä wie Baggafahra odda Loggomodivfihra odda schaffä. Unn: Schleschdi Schdimmung? Kä Problääm – kønn isch!!!

Kontakt: kall@mamo.de