Mønnema Maulwirf

Leit, isch bin ma sischa, wønnma so än Marsmänsch wehr unn so gønz vunn owwä uff Møonnem nunna guggä käängt, deed ma sagä: „Ou, do gugg, die Mønnema hawwä Maulwirf – unn wie! Ä reglräschdi Ploog iss dess!“ Isch mähn, so än Marsmänsch, also selbsch wønns än schlauä iss, der Mønnemarisch kønn, der kønn jo nädd wissä, wer do bei uns grawä unn schaufflä unn schibbä unn aushewä duud, dess iss kla. Awwa isch mähn, also mol ehrlisch, dess wissä mir jo a selwa nädd so gänau, odda? Dassä woiwwa-all grawä, dess seh ma jo. Fahrsch hald nimmi hie, uff de Lindähof, nooch Søndhoffä, uff die Rhoinau, in die Neggaschtadt odda iwwa die Auguschdaølaag. Wønnse da gonzä Värdel vunn drei Seidä discht machä, issdas hald irgänwønn zu bleed. Do graabts Lønd, do die Schtadt, do de Bund, do die Telekøm, do die MVV, do dä Scheidl, die Bøhn, de VRN unn wass weeß dønn isch wer noch alles. In die Kwadradä sollsch jo a nimmi, alla bleiwischs beschdä dehäm. Awwa do laafd heid seit kørz noch de siewwänä a schunn widda abwechsälnd de Bagga, die Bedøngfrees unn de Riddla. Hald eisch feschd – än Klassika: Innhalb vunn siwwä Mønat dess driddä Mol reissä se’ma vor de Hausdir s’gønzä Trottwa uff. Erschd die Färnwärm, dønn fä uuneedischä Ladännä unnd jetztad fer Breitbøndkawl im Ufftrag vunn de Telekøm. Dess ewischä Menschheitsredsl,ob ma die unnairdisch Grawarei als nädd ä bissl bessa abschdimmä kängt, iss schoints ä Uffgab fä iwwairdische Intelligenz. Isch hab jetzt mol moin Marsmønn gfroogt. Der mähnt awwa, dess deed in de Schdännä schdehä, unn wer sogaa fä kinstlischi Intelligänz ä eschdi Rausfordärung. Vunnäm Maulwurf hedda alladings kehrt, dass dess bei mir in de Gass fä dess Johr noch nädd des letschdä Mol gewesä wer …

Kontakt: kall@mamo.de