Kännt ihr dess Phänomän, dass ma alledaag mit jemønd zu duä hodd, dänn ma eigändlisch ga nädd kennä duud? Der da awwa trotzdäm furschtbar uff die Närvä gehe kønn? Zum Beischpiel dänn dabbischä „Seitenbacher“ midd soim „Legga-Legga-Müsli“? Kønnsch de Radio oischaldä wo imma de willsch – alle Ritt kummt dämm soi bleeds Gebabbl unn schlubbda ins Härn noi. Dämm soi Kärnafudda kaaf isch schunn aus Protescht nädd, weil ma der Käll so granadämeßisch uff die Hutschnur geht.
Awwa dess iss alles nix gegä dänn onnara Simbl. „Adobe Reader“ heeßtda, dess is wohl mehr Englisch odda so unn kännd vumm Nømä heer vielleischt soga ä Fraa soi – dess iss jo heid a nimmi so wischdisch. Jedänfalls schießt der odda die „Adobe Reader“ in Sachä Nerv-Fakkdor bei mir de Voggl ab. Du hosch doin Compjuda noch nädd rischdisch hochgfahrä, schunn will der Sargnaggl, der øschträngändä, wass vunnda. Kønnsch øgliggä wassdä willsch, Mails odda Dokumendä odda wass a imma, dauernd blinkt dada däzwischä, ploppt uff, froogd disch wass, wass de selwa nädd so gänau weeschd. Imma willa irgändwass, wassde middäm machä sollsch. Runnaladä, akdualisierä, ønmeldä, upgräjde, bezahlä sollsch än, dänn Käll dänn närvischä. Isch saachs Eisch: Wønn isch dänn mol uff de Schdrooß träff – dønn kehrtda de Katz! Der froogt misch nixmeh!
Kontakt: kall@mamo.de
URL dieses Artikels:
https://www.schwetzinger-zeitung.de/kultur_artikel,-kultur-kaennt-ihr-daenn-m%C3%B8nn-_arid,1966261.html
Links in diesem Artikel:
[1] https://www.mannheimer-morgen.demailto:kall@mamo.de