Wønn isch dänn finn!

Ihr Leit, ich will eisch heit widda mol moi Leid klagä iwwa ä Sach, die ma hartneggisch uff de Geischt geht: moi Brill! Isch hab eisch jo schunn vor längerem fazehlt, dass dess Ding nie do iss, wønn unn wo’s brauchsch. Iwwa dänn Gleitischt-Wøhnsinn hawwisch misch a schunn beschwert. Ønarä Brillätrega, isch weeßda a nädd, ma kännt unn sieht jo genug, die hawwä ä Brill uff de Naas – unn färdisch. Morgäns uff, owänds runna, aus die Maus. Bloß bei mir iss dess schoint’s imma so än Zierguss.

Jetzad hawwischs neischdä Problääm. Die Brill babbt wie dabbisch. Morgäns wärdse gebutzt... unn dønn bin isch vooorsischdisch, gøøønz vooorsischdisch, dä liewä løngä Daag. Isch løng nädd druff, isch kumm nädd drø, am liebscdä deed isch se midd OP-Høndschuff uff- unn absetzte. Isch deedä mol sagä so nooch zwee Schtund iss aus. Do seh isch bloss Newwl unn Schlierä. Isch kämpf mit allem, wass isch hab! Mit Spüli, heeß Wassa, Schpiritus, Glasroin, Loinä, Mikrofaser unn Ultraschall! Machsch nix – ä Schtund, zwee, unn schunn iss widda vorbei. Als deedma hoimlisch änna alle 59 Minuddä midd Buddafett die Gleesa abreiwä! Odda Griewäschmalz odda Grießpudding odda wass weeß døonn isch wass der nämmä duud. Der iss doch bäschdellt, dess iss doch Absischt! Isch saag eisch: Wønn isch dänn finn...!

Wass? Dohinnä raunt unn zedart wass, watt mo, die Fraa will isch was sagä. Allä geh her, wass issn? „Kall, heer uff zu jäämern! Wønn ma allä fünf Minuddä am Gutsl-Tella vorbeischleicht, unn sich ä Vanillkipferl zwischä die Zäh schiebt – unn dønn noch øn die Doos middä Makkrønä will, die ma awwa ohne Brill nädd uffbringt, die ma donn midd feddischä Finga uffsetzt... Heerma uff! Vunn moim Woihnachtsgudselschwund iss kä Rädd. Dess sinn schoints a die Moinzelmännschä, gell? Siehsch DU dursch moi Brill jetz widda klara?“ Wonnse mähnt; isch sag nix meh!

Kontakt: kall@mamo.de