Neilisch, mir hoggä beim Wänna in de Beitz, fliegt die Dier uff unn – ihr kännd’s eisch dängä – de Häbbädd kummt noigschdochä. „Wänna, ruffda noch im Schteschschritt zu unserm Wärd hinna die Thek, mach ma mol ä schnelles Pilz unn än Kørzä, sei so gut.“ Dä Wänna in soina Mønier: „Ärschdäns: Tach, heeß dess, wømma wo noikummt, und zweddäns: Ä schnelles Pilz gibt’s nädd, Häbädd. Wass hosch dønn schunn widda?“
Im Radio bei „SWR 1 Leute“ hedd unnsa, also die badän-wirttembärgisch Umweltminischderin gschprochä, klehrt da uns uff. Um dämm Kretschmønn soin Weschlabbä, also Weschlumbä, wie ma bei uns sagt, seis gøngä. Do hädd die Fraa, also die Minischderin Thekla Walker fä Umwelt, Klima unn Ännagiewärdschafd, dämm „schwewischä Walduhu vunn Kretschmønn“, so hodda’s gsacht, de Häbbädd, a noch s’Kreiz gschdärkt, was allahønd wer. Dass „so änn Weschlabbä ä brauchbari Erfinnung wer, dess hodda gsacht unn die gib’däm a noch Räschd“, regtda sisch uff. „Vunn de Aussag her iss dess jo a ärschdmol rischdisch“, sagt unsann Wärdschafdsphilosoph Wänna. „Isch habb nix gegä än Weschlumbä, dess geht schunn ä mol, isch bin jo nädd bleed. Awwa wass iss midd dännä Leit die kärwalisch schaffä missä, hä? Unn bei dänna Tembaradurä, wo da de gøonzä Daag die Brieh laafd. Dess iss do ä Sauarei!“, mault de Häbädd. „Also dass Wassa gschpard wärd, iss doch wohl rischdisch, Häbbädd. Guggä mol naus! Vaschdebbung wohie de gugschd“, mähn isch, wiea sisch so uffømselt.
„Willsch ma sagä, dass ä Thekla mit 200 Euro Blondiermiddl uffm Kopp morgäns de Weschlumbä nimmt, hä? Unn die hald ma iwwas Radio vumm klimadisierte Løndtag aus Vorträg, dass ma ,Maß unn Middä im Aag behaldä’ soll?“, froogt da unn kippt soin Kørzä uff ään Schluck nunna. „Maß unn Middä“, brodelda unn schiddlt de Kopp, de Häbädd. „Dess sagt ma äni, die 16 Semeschda Gschischdä schtudiert hodd – øhnä Abschluss, glaabsch dess?“
S’ helfä kä Argumändä, ma kennän nädd beruhischä, unsann Hebbädd. „Schdingä werä ma wie die Odda!“, grointda. De Hoinz dedschält äm die Schulda: „Awwa dess macht doch nix Häbädd! Ab Härbschd hoggä ma øm Schdømmdisch sowieso widda midd Masgä – unn innarä kaldä Wärdschafd. Do isses dønn auszuhaldä middäm Gschdønk...“
Kontakt: kall@mamo.de
URL dieses Artikels:
https://www.schwetzinger-zeitung.de/leben_artikel,-ansichtssache-de-kall-maehnt-derae-thekla-schigg-isch-aen-weschlumbae-_arid,1996461.html
Links in diesem Artikel:
[1] https://www.mannheimer-morgen.demailto:kall@mamo.de