De Kall mähnt: Gebt ma ä Rezept!

Habt ihr ä Rezept fär misch? Also känns fä Keeskuchä odda de Døndä Härda ihrn Kaddofflsalat. Äns vumm Doggda mähn isch. Isch breischd sozusagä ä Rezept färs Rezept, also än Tipp fä dä Umgøng midd dämm Wøhnsinn vunn Babierkrieg, dänn ähm die Ärzt, Abbodhega unn Krøngäkassä do uffzwingä.

Ärscht muscht kwardalweis biddä unn beddlä, dass dä äns krigsch, so ä Rezept, s’musch dønn abholä, weil schiggä kennes die meischdä Ärzt wegä Armut nimmi. Dønn laafsch, fahrsch odda radälsch do hie, dønn isses nädd färdisch. Do watsch. In de Abbodheeg sagä se da dønn, dasses die Tableddä ga nimmi gibt, odda zumindescht nädd so, wiesä uffm Rezept schdehä. Musch widda zurigg unn widda hie. Mol iss die Unnaschrift fagessä, mol än Hogä zu wänisch. Känsch fariggd wärrä! Wønn dess noch fä jemønd besorgä musch, der krønk iss, iss gønz aus. Dønn kønsch vunn doim Wohnort, sagä ma mol de Vogglschdøng, dess Rezept in Neggara beim Arzt holä. Dønn in ä Abbodheeg gehä, wosä dess Zeig nadierlisch nädd hawwä, awwa beschdellä kännä. Donn fahrsch do middags nochämol hie, liefersch dess Zeig, sagä ma mohl in Briehl aus. Jetz brauch jo der Doggda in Neggara awwa dess Fasischerdä-Kärtschä fers Ausschdellä vumm Rezept! Also dess Kärdschä vunn Briehl noch Neggara – unn dønn nadielisch widda zum Kardää-Inhawär zurigg – unn dønn hääm uff die Vogglschdøng. Schpezialfall: Physio! Ohnä Rezept, kähn Tärmin. Tärmine gibt’s awwa ärschd im April – do gillt awwa dess Rezept nimmi! Alla nochämol zum Doggda.... Isch wär ball bleed! Babierlosä Braxä hawwäsä, awwa du Paziendä-Wärschdl sollsch ä halwi Woch Babier rumdragä. Dess iss doch dännä egal! Deed mol jemond uff die Idee kummä, dess Rezept uffs Handy odda de Krongäkassä-Tschipp zu ladä, hä? Nadierlisch nädd! Hoddä mol änna vunn Schpøhn iwwa Montgomery bis Laudabach ausgeräschnt, wieviel Kilometer, Benzin, Schuhsohlä unn CO2 in Deitschlønd jeden Daag fä dänn Rezept-Wøhnsinn gschrubbt wärrä? Vunn Zeit unn Nervä will isch ga nädd räddä! Isch misch uffregä? Iwoo!