Mach ma än Knopp drø!

De Wänna, ihr wissd, unsern Wärd, der hodd ä neiäs Audo. Wass der Benz-Wachä alles kønn, dess glaabsch nädd. Rickwärds, vorwärds fahrd dess Ding audomadisch in die Parkligg noi, mid Kømmera und allä Ferz. De Häbädd deed saagä „Der Karrä kønn alles - bis uff Kadoffelsalat!“ Naja, de Häbädd, babbelt jo a als mol bleed Zeig. De Wenna iss jetzt seidäm driddä Advent middä Gebrauchoweisung bescheffdischt. Wønnda misch froogt - klarkummä duuda nädd midd dämm Raumschiff vunnemä Audo. Iss jo alles elektrisch, gell. Also elektrønisch, mähn isch, also alles „Tatsch-Skrien“ unn so. Dusch wo hiedabbsä, machda wärmer oder lauda odda schnellea odda so. Wonn die Aagä awwa schleschdaa, s’Härn løngsøma unn die Finga digga wärrä, iss die Sach alsämol kompliziert. Wie isch middäm gfahrä binn, hodd die Kischd als middäm Wänna gebbabelt. Die Schpur solla haldä, ä Paus oilegä (vunn Värnnä nooch Keffadaal!!!) unn mit 20 km/h øm beschdä schunn im sechsdä Gøng fahrä. „Beim neiä Golf“, mähnt de Wänna, „isses awwa noch schlimma middäm Geblink und Gemach!“ Obäm des wass nitzt , will isch wissä, krigg awwa kä Øntwort. Än Radiosenda iss geloffä, dassdä taub hedsch wärrä kännä. Er deed soin Senda nimmi noigriggä, weila ausm Menü nimmi rauskommt...

„A soll isch mol?“ Do war’s schunn zu speet. Wo’s Navi war, wärd jetzt hald die Baddarie-Schdatistik øgezeigt... Wia sich beruhischd hodd, mähnt da: „Kall, mach ma än Knopp drø! Isch wärr fariggd midd dem Zeisch. Moin ärschdä Keffa wars beschdä Audo!“ Dess mag soi. Warum ma beim Fahrä nädd middäm Händy telefonierä, awwa die gønz Fahrt uff dämm Tatsch-Skrien unn Lenkrad rumfummlä därff, dess därfda misch awwa nädd frøgä.

Kontakt: kall@mamo.de