Claun oder Zugvoggl

Fär neun Euro kummsch jo jetz viel rumm, gell, s’iss schää Wedda unn schää waarm, ma macht Ausflieg unn fahrt Zug, wo man nur kønn. Also zumindescht die Leit, die bereit sinn, ihrn Karrä alsmo schdehä zu lossä. Mønschmol kummsch hald dønn trotzdäm nädd drumm rum, middäm IC odda ICE zu fahrä, weildass Gezoggl uff Newäschdrägge zu løng gehä deed odda die Schträck äfach zu weit iss.

Wønn dä im Schnellzug hoggsch, hoschdä zudäm jo a imma wass zu vazehlä. Nää, isch rädd heid mol nädd iwwa Vaschbeedungä, Beschungsbrønd, Wagäreihung, Owwaleidungsscheedä odda Gleisarweidä. Isch rädd heidä mol vunn dännä sogenønndä Zugscheffs, die jo neiadings schoints ä Zusatzausbildung hawwä. Die babblä nämisch alsämol ä Zeig iwwa die Lautschpreschaølag, dassdä mähne kennschd, die heddä ä Kaschperlä gfriehschdickt

Isch mähn, kla, wønndä bei de Bøhn schaffsch, brauchsch Humor, sunsch wärsch variggd! Awwa middlaweil sinn dess jo Allääunnahalda! „Bidddäschööön“ sachda beim Kaddäabzwiggää wie soinazeit de Plumperquatsch („Glucks unn trübes Wassaaa!“) im Färnseh, wønnda dänn noch kennt.

Unn dønn iwwa Lautschprescha: Fä dänn uwahrschoinlischä Fall vunn äm Druckbabfall, deedä hier kä Sauaschdoffmaskä vunn de Deck fallä... Ä Weil schpeeda: Øschnallä määsd ma sich dohinn a nädd. Die Toläddä werä – uabhängisch vunn de Wagereihung – jeweils øm Øføng unn am Änd vumm Waggong. Dess iss doch än Claun, der Voggl! Hald, isch muss misch korrigierä: In däm Fall issäs soga än Zugvoggl!

Kontakt: kall@mamo.de