Die Ømsl vunn driwwä!

Die Leid hawwä jo als die dollschdä Ideä. Do fallda nixmeh oi. Die vunn hinnä, also die komisch Ømsl, wo hinna ma wohnt, also ä Nochbern iss dess känni, soll dess heeße, hoddma neilisch middä Dräggschibb Katzedrägg iwwas Meierlä gekippt. Däbei hawwisch ga kä Katz! Isch konnsä näddämol leidä, die Viescha. Awwa nää, isch habb kä Luftdruckgewehr, dass dess kla iss. „Isch glaab als, s’geht los! Allahønd unn ä Sauarei iss dess!“ brill isch, „Die Katz, die ihnä in de Gadda macht, kehrt de Ønna driwwä!“ kreisch isch iwwa Woilaub unn Meierlä zu derä hinna.

Kreischtsä zurigg, die vunn hinnä: „Donn schmeißänsä dänn gedriggeldä Katzedrägg doch grad weida zu de Ønna niwwa!“ S’därf nädd wohr soi, denk isch. Fräsch sinn die Leit, die in doina Neeh wohnä. Awwa Nochbern sinn dess nädd. Iss Ihnä unn eisch dess schumol uffgfallä? Also nädd, dass die Leit fräsch sinn, dess iss beschdimmt jedäm schunn uffgfallä, awwa nää, isch mähn, dass ma in de Kurpalz so schänä Ersatzwerda fär „Nachbarn“ gfunnä hodd. Die Leit heeßä bei uns hald ewä ønnarschda wie øonnarschdwo, beischpielsweis so: die vunn driwwä, de Ønna unnä, die vunn newädrø, der vunn iwwädriwwa, der vunn gønz owwä, die vunn zweeweida, die schreeg driwwä, der hinnädrø. An charaktarisierändä Bägleitwärdda wärdd nadierlisch alsämol nädd gschpaart.

Zu derä Rischdungsøgaab kummä dønn so Bägriff wie „de Fadriggdä“, „die Uffgedunnert“, „die Krischärn“ däzu. Do gibt’s kä Gränzä unn geht vunn „Simpl“ odda „Bluns“ mit „der Voggl“ unn „die Schnepf“ dønn løngsøm ins gonzä Tierreisch iwwa. Unn wass lärnä ma dodrauß? In de Kurpalz iss nädd jeda, der newa da wohnt, audomatisch ähn Nochber! Dodäzu braucht’s bei uns schunn mehr. Dess muss ma sisch bei uns fadienä! Dess schreibt eisch

Kontakt: kall@mamo.de