Die eiskalt Soffi iss brudaal!

Øm 15. Mai war’s jetz soweit: Middä kalt Soffi, sinnse allä dursch, die Eisheilischä, kä Øngschd vor Froschd brauch ma mehr hawwä als Gärtler. In de Gaddäzända laafd zwar schunn ä gønzi Weil ä Gscheffd, awwa jetz gibt’s kä Haldä mehr, do iss de Deifl los, s’wärd gekaaft, wass die Haushaltskass hergibt. Wer jetz nädd schnell wass in die Erd bringt, dämm kønn mønschäs bliehä – awwa kä Blummä mehr.

Dass fä griinä Daumä Hochsesong iss, wissa nadierlisch a die Gscheftsleit. Unn so ä Pletzl im Grinä,wo Ruh, Friedä unn Øitracht herrschää, iss jo wass Schänäs. Awwa Ruh unn Friedä im Gaddä? Die kännä des Rasemeeha vumm moim Nochber nädd! Mol ehrlisch: Habbda eisch mol die Wärwung unn Proschbegdä vunn de Diskaunda odda Gaddäzända øggeguckt? Dänn Oidruck vunn friedlischa Gaddäarweit, wo ma in alla Ruh vor sich hieschafft, hab isch do nädd – die eiskalt Soffi kønn gønz schä brudaal soi: De XZ Ultra-Rasäkøndäschneider, de Power-Turbohexler, än Värdigodiera wie än Pønza, Rasämeha, midd dännä Rennä fahrä kønnsch, ä gønzi Armada vunn martialischä Gerätschaffdä wärd do øgeboodä! Unn dønn die chämischä Keulä: Schneggä-Ex, Aluminiumsulfat fä die Hordänsiä, Kaliumoxid fä die Gerøniä... Isch weesda nädd, mir macht dess mehr Øngsch wie Froscht.

Kontakt: kall@mamo.de